لەپێناو پەردەپۆشكردنی شكستەكانیان

لەپێناو پەردەپۆشكردنی شكستەكانیان

هەندێ لە پەرلەمانتاران لە ژێر پەردەی پارێزبەندی سوكایەتی بە حوكمڕانی كوردی دەكەن 

مەهدی محەممەد – سۆران :
ماوەیەكە هەندێ لە پەرلەمانتاران، قسە لەسەر هەموو شتێك دەكەن و بە ئارەزووی خۆیان ژمارە فرێدەدەن و جاری واش هەیە، سنووری قسەكانیان لە چوارچێوەی ئەرك و كارەكانیان تێپەڕ دەكات و بە سوكایەتیكردن بە پیرۆزییەكانی نیشتمان و حوكمڕانی كۆتایی دەهێت، مافناسێك لە ئیدارەی سۆران، پێی وایە لێدوانە ئاگرینەكانی هەندێ لە پەرلەمانتارانی بەشێك لە فراكسیۆنەكان، مەبەست لێی گەیشتنە بەو ئامانجە سیاسییانەی خۆیان و پەردەپۆشكردنی شكستەكانییان و ناشیرینكردنی حوكمڕانی هەرێمی كوردستانە!
سەنار شێرۆكی مافناس باس لەوەش دەكات كە ئەو پەرلەمانتارانە لە ژێر پەردەی پارێزبەندی بە نیازن هەرێمی كوردستان و خاك و زەوییەكەی تەنانەت گەلەكەشیان هەرزان فرۆش دەكەن، بۆیە دەڵێت"پەرلەمانتار بە دەنگی خەڵك هەڵدەبژێررێت، تا نوێنەرایەتی چینێكی دیاریكراو بكات، بە مەبەستی پاراستنی بەرژەوەندییەكانیان، بە پێی یاسایەكی دیاریكراو كە ئەویش پەیڕەوەی ناوخۆیە، چونكە سیستەمی سیاسی لە هەر وڵاتێك رێكخراوەو لە هەرێمی كوردستانیش بە هەمان شێوە هەڵسوكەوت و شێوازی كاركردنی ئەندام پەرلەمان لە چوارچێوەی ئەو یاسایە رێكخراوە، بە پێی پەیڕەوی ناوخۆی پەرلەمانی كوردستان ژمارە (1)ی ساڵی 1992، لەو یاسایەدا چەندین تایبەتمەندی جیاواز بۆ پەرلەمانتار بە مەبەستی بەدواداچوون لە ئەركەكانییان دیاریكراوە، ئەوەش لە هەر دوو ماددەی 26 و 27ی پەیڕەوی ناوخۆی پەرلەمانە كە جەختی لە سەر پارێزبەندی پەرلەمانی لە سەر پەرلەمانتار كردووە كە لە ماددەی 26دا هاتووە: (ئەندام لە سەر رادەربڕین و ئەو رووداوانەی لە كاتی بەجێگەیاندنیی كارەكانی لە پەرلەماندا لێپرسینەوەی لەگەڵدا ناكرێت)، ئەو ماددەیە پارێزبەندی بە ئەندام پەرلەمان و ئازادییەكی تەواوی پێ بەخشیوە، لە سەر دەربڕین و راو بۆچوونی تەواو ئازادە بە شێوەیەك كە ئەو ئازادییە بۆ دەمەقاڵێ و جنێودان بە یەكتری و زۆر شتی تر سەر دەكێشیت و لەو ماددەیەدا هیچ كەس و لایەن و دامەزراوەیەك ناتوانیت لێپێچینەوەیان لەگەڵدا بكات، تەنانەت لە كاتی ئەنجامدانی تاوانیش و یان داواكردنی لە دادگاكان بە بێ مۆڵەت وەرگرتن لە پەرلەمان و یان هەڵگرتنی پارێزبەندی، ئەوەش بە پێشكەشكردنی داواكارییەك بە سەرۆكی پەرلەمان بە هەڵگرتنی پارێزبەندی لە سەر ئەو ئەندام پەرلەمانە لە 5 خاڵدا لە مادەی 27 لە پەیڕەوەی ناوخۆی پەرلەمان دیاریكراوە، تەنیا لە تاوانی بینراو نەبێت كە ئەو دەسەڵاتە دەدات بە لایەن و یان دامەزراوەكان بۆ ئەوەی راستەوخۆ ئەندام پەرلەمان بە بێ پارێزبەندی رووبەڕووی بكرێتەوە كە ئەوەش لە ماددەی 24ی پەیڕەوەی ناوخۆدا دیاری كراوە".
سەنار باس لەوەش دەكات كە پەرلەمانتار دەسەڵاتی تەواوی پێدراوە تەداخول لە هەر شێك بكات كە لە بەرژەوەندی دەنگدەرانی بێت، بەڵام هەروەكو ئەو مافناسە هێمای بۆ دەكات زۆرجار پەرلەمانتار ئەو دەسەڵات پێدانەی بۆ بەرژەوەندی كەسی و حیزبەكەی بەكارهێناوە و دەڵێ‌"بە پێی ئەو ماددانەی كە لە سەرەوە ئاماژەیان پێكراوە ئەندام پەرلەمان دەسەڵاتی پێ بەخشراوە لە هەموو جۆرە هەڵسوكەوتێك لەكاتی ئەنجامدانی كارەكانیان، بە تایبەتی ئەگەر هاتوو لە بەرژەوەندی هاووڵاتییان یان دەنگدەرانیان بووە و ئەوەش وەكوو بەشێك لە دەسەڵاتی چاودێری لە سەر حكومەت لەتەك دەسەڵاتی پێنجەم لە قەلەم دەدرێت، بۆ ئەوەی حكومەت و دامەزراوەكان كارەكانی خۆیان بە باشی بەڕێوە ببەن. ئەوەش وا دەكات لە هەندێك كاتدا ئەندام پەرلەمان بخاتە سەرەوەی یاسا و ئەو ئەركەی كە هەیەتی خراپ بە كاری بهێنیت و لە كارەكانیان زێدەڕۆیی بكەن و كەمتر كارەكانی لە بەرژەوەندی هاووڵاتییان بێت"،
بوونی موچەیەكی زۆر وای لە هەندێ پەرلەمانتار كردووە هەموو كارێك بكات بۆ ئەوەی خولێكی تریش دەربچێتەوە، لەم پێناوەشدا رێگاگەلێك دەگرێتەبەر بۆ مانەوە، كە هەندێ جار بە سوكایەتیكردن بە پیرۆزییەكانی نیشتمان بەكۆتا دەهێت، سەنار دەڵێ‌"بە هۆی ئەو مووچەی زەبەلاحەی كە بۆ ئەندام پەرلەمان تەرخان كراوە و بۆ دووبارە هەڵبژاردنی لە خولی داهاتوو هەموو رێچكەیەك دەبڕیت و زۆرجار بە ناوی پاراستنی بەرژەوەندی هاووڵاتییەوە لە رێگەی كۆڕ و سیمینار و تەنانەت سۆسیال میدیاوە تۆمەت دەبەخشیتەوە و بە ئارەزووی خۆی ژمارەی خەیاڵی فڕێ دەدات، ئەوەش لە چوارچێوەی پارێزبەندی پەرلەمانتار دەچیتە دەرەوە، چوونكە پارێزبەندی پەرلەمانتار هەموو گوتەیەك یان نوسینەك دەگریتەوە كە لە ناو پەرلەمان و یان لە ناو لیژنەكان ئەنجامی دەدات، ئەگەر هاتوو ئەو رووداو و وتانە لە چوارچێوەی كاری پەرلەمانی دابن و یان بە هۆی كاری پەرلەمانییەوە بن لە دەرەوەی پەرلەمان و ئەگەر بە هۆی سیفەتی كەسییەوە بن، ئەوە ناكرێت و ناشێت بەو شێوەیە بەردەوام بن تەنانەت ئەگەر ئەو كارەش لە پێناو بەرژەوەندی گشتی یان دەنگدەرانییەوە بیت" .
شێرۆكی لە كۆتا قسەكانی دا دەڵێت"دەكرێ ئەندام پەرلەمان لە چوارچێوەیەكی ئەخلاقیدا و لە پێناو خەڵكدا رەخنە بگریت و بە دواداچوون بكات، پرۆژەیاسا پێشكەش بكات و بنووسیت بەڵام لە سەر حیسابی تێكدانی حوكمڕانی و سیاسەتی گشتی حكومەتی هەرێم و بەرژەوەندی حیزبەكەی نەبێت".

زۆرترین بینراو