ئیدارەی سۆران و گەشتیاری

مەهدی محەمەد خەیلانی

سێكتەری گەشتیاری وەكو هەریەك لە سێكتەرەكانی تر گرنگی و بایەخی خۆی هەیە بۆ وڵاتان، یان بۆ ناوچە و پارێزگا و ئیدارە سەربەخۆیەكان، بەڵام بۆ ئیدارەی سۆران گرینگییەكی تایبەتی هەیە، لەبەر هەڵكەوتەی سنووری جوگرافیای ئیدارەی سۆران، كە هەر یەك لە (سۆران، رواندز، چۆمان، مێرگەسۆر) لەخۆدەگرێت، كە سنووری هەر چوار قەزاكە پڕیەتی لە شوێنی گەشتیاری زۆر جوان و سەرنج راكێش، كە ساڵانە گەشتیارێكی یەكجار زۆر لە ناوەڕاست و خوارووی عێراق ڕووی تێدەكەن، بەهۆی خۆشی ئاو و هەوا و سەرنج ڕاكێشی ناوچەكە، هەروەها ساڵانە خەڵكێكی زۆری ناوچەكە سوودمەند دەبن لەو شوێنە گەشتیاریانە، بەتایبەتی وەك هەلی كار، سوودمەندانی گەشتیاران تەنها خاوەن ئەو شوێنانە نین راستە سوودمەندی یەكەم ئەوانن، بەڵام بگرە سوودمەندەكان خاوەن ئۆتێڵ، موتێڵ، رێستورانت، ماركێت و شوفێرانی تەكسی و بگرە میوە فرۆشێكی سەرشەقامیش سوودمەند دەبێت، بۆیە پێویستە حكوومەت گرنگی زیاتر بدات بەو سێكتەرە لەڕووی ڕێگاوبان و خزمەتگوزارییە گشتییەكان بۆ ئەو شوێنانە، بۆئەوەی ببێتە جێگای سەرنج و پاڵنەر بۆ هاتنی زیاتری گەشتیاران بۆ ناوچەكە، بەپێی ئاماری وەزارەتی گەشتوگوزار لە ڕۆژانی جەژن زیاتر لە ٧٠ هەزار گەشتیار ڕوویان لە شوێنە گەشتیاریەكانی ئیدارەی سۆران كردووە، كە نزیكەی ١٥ هەزار لە ئۆتێڵ و موتێڵ و گوندە گەشتیاریەكان ماونەتەوە، بۆیە زۆر پێویستە بیر لە فراوانكردنی ڕێگاوبانەكان بكرێتەوە بەتایبەتی ڕێگای نێو گەلی عەلی بەگ، چونكە لە ڕۆژانی پشوو دەبێتە قەرەبالغییەكی یەكجار زۆر، بۆیە پێویستە پەڵە بكرێت لە فراوانكردنی شەقامەكان".

زۆرترین بینراو