ئەمساڵ بەراورد بە ساڵانی رابردوو رووداوەكانی خنكان زیادیان كردووە

ئەمساڵ بەراورد بە ساڵانی رابردوو رووداوەكانی خنكان زیادیان كردووە

محەمەد هەسنانی-سۆران:
گووتەبێژی بەڕێوەبەرایەتی بەرگری شارستانی سۆران، ئاشكرای دەكات "سەرەڕای رێنمایی و هەڵواسینی تابلۆی هۆشیاركردنەوە لەسەر رووبارەكانی سنوورەكەمان، بەداخەوە بەپێی ئامارەكان ئەمساڵ بەراورد بەساڵانی رابردوو رووداوەكانی خنكان زیادیان كردووە.
لەبەردەوامی قسەكانیدا مقەدەم بەیار محیەدین، گووتەبێژی بەڕێوەبەرایەتی بەرگری شارستانی سۆران، بە زاری كرمانجی راگەیاند:" لە چەند رۆژی رابردوودا هاووڵاتییەك بەناوی یوسف ئەحمەد مراد، تەمەن 22 ساڵان خەڵكی رۆژئاوای كوردستان لە رووباری زرارا لە سنووری قەزای مێرگەسۆر خنكا، كە ناوبراو لە یەكێك لە كێڵگە پەلەوەریەكانی نزیك رووبارەكە كرێكاری دەكرد.
ئەمە لە كاتێكدایدایە بەپێی ئامارەكانی بەرگری شارستانی سۆران لە سەرەتای ساڵی 2021 تائێستا لە سنووری ئیدارەی سەربەخۆی سۆران 14 كەس خنكاون، وەك گووتەبێژی بەڕێوەبەرایەتی بەرگری شارستانی سۆران، ئاماژەی بۆ كرد: "سەرەڕای رێنمایی و هەڵواسینی تابلۆی هۆشیاركردنەوە و جێگیر كردنی تیمەكانیان لەسەر رووبارەكان، ئەمساڵ بە بەراورد بەساڵانی رابردوو رووداوەكانی خنكان زیاد بوونە، سەرەڕای رزگار كردنی چەند كەسێك لە خنكان".
مقەدەم بەیار محیەدین، ئەوەش دەخاتەڕوو: "زۆربەی ئەو كەسانەی ئەمساڵ لە سنوورەكەمان خنكاون گەشتیاران و كەسانی شوێنەكانی دیكە بوونە، بەمەبەستی گەشت و سەیران و كرێكاری روویان لە دەڤەرەكە كردووە، بەهۆی ناشارەزایی و هەڵكەوتەی ناوچەكە خنكاون، هەندێك لەوانە چەندین رۆژ تیمەكانی مەلەوانی و بەرگری شارستانی لە شارو شارۆچكەكانی ئیدارەی سەربەخۆی سۆران، لە ئەرك و ماندووبوون دابوونە بۆ دۆزینەوەی تەرمەكانیان".

 

زۆرترین بینراو