ئەمساڵ 284 كەس لە ئیدارەی سۆران بوونەتە قوربانی

ئەمساڵ 284 كەس لە ئیدارەی سۆران بوونەتە قوربانی

دیدار : پشتیوان كەریم – سۆران
لە دیدارێكی هەفتەنامەی زاری كرمانجی دا، گووتەبێژی هاتووچۆی ئیدارەی سۆران رایدەگەینێت، لە دە مانگی ئەمساڵدا لە سنووری بەڕێوەبەرایەتیەكەمان، 190 رووداوی هاتووچۆ روویانداوە، بەو هۆیەوە 13 هاووڵاتی گیانیان لە دەستداوە و  271 هاووڵاتی دیكەش  بریندار بوونە.
لە دەسپێكی قسەكانیدا، مقەدەم موحسین تەحسین، گووتەبێژی بەڕێوەبەرایەتی هاتووچۆی سۆران، گووتی"  لە ماوەی  رابردوودا بە  بڕیاری وەزارەتی ناوخۆ دەستكرا بە تۆماركردنی تەواوی ئەو ئۆتۆمبێلانەی كە بێسەرەتان، لە سنووری  هەر چوار قەزا دەستمانكرد بە تۆماركردنی ئەو ئۆتومبێلانە و زۆرترین رێژەی ئەم ئۆتۆمبێلە بێسەراتایانە لە سنووری بەرێوەبەرایەتییەكەمان تۆماركراون، وەزارەتی ناوخۆ دەسەڵاتی هەیە هەر بڕیارێك لەم بارەیەوە بدات. 
گووتەبێژی هاتووچۆی سۆران، دەڵێت" وەزارەتی ناوخۆی كوردستان بە هەماهەنگی لەگەڵ حكوومەتی ناوەند گفتوگۆكراوە بۆ گۆڕینی تابلۆی ئۆتۆمبێل لەسەرتاسەری پارێزگاكانی عێراق و بە هەرێمی كوردستانیشەوە، لەم بارەیەوە رێكەوتن لەگەڵ كۆمپانییایەكی بیانی كراوە و لە ئایندەدا دەست دەكرێت بە دروستكردنی تابلۆی نوێ كە جیاوازی لەگەڵ تابلۆی پێشتر هەیە و بەپیتی كورتكراوەی ئینگلیزی لەسەر تابلۆكان ناوی پارێزگاكان دەنووسرێت ".
لەبارەی دەستبەسەر داگرتنی ماتۆڕسكیل، مقەدەم موحسین تەحسین، ئاشكرای كرد" هەر ماتۆڕسكیلێك  لەلایەن مەفرەزەكانی پۆلیسی هاتووچۆ لە سنووری هەر چوار قەزا ببیندرێت راستەوخۆ دەستییان بەسەردا دەگرن، یەكەم جار  ئەو ماتۆڕسكیلانەی كە دەستكاری  گزۆزەكەی دەكەن، بۆ ئەوەی دەنگی زیاتر بەرز بێتەوە لە هەر شوێنێك كە مەفرەزە هەبێت دەستی بەسەردا دەگیرێت، هەروەها لە لایەن مەفرەزە گەڕۆكەكانیش بەرچاو بكەێت  دەستی بەسەردا دەگیرێت". 
ئاماژەشی بەوەدا" ئەو منداڵانەی كە شۆفێری دەكەن، لەرووی یاساییەوە ناتوانین مامەڵەییان لەگەڵ بكەین، بۆیە ئێمە رادەستی پۆلیسی نەوجەوانانی ئیدارەی سۆرانییان دەكەین، داوا لە باوكان و دایكان دەكەین كەوا ئۆتۆمبێلەكانییان بە هیچ شێوەیەك نەدەنە دەستی منداڵەكانیان كە تەمەنی یاساییان تەواو نەكردووە و مۆڵەتی شوفێریان نییە، بۆیە لەهەر دەرفەتێكدا منداڵ شۆفێری بكات ئەگەری رووداوی نەخوازراوی هەیە.
لە بەردەوامی قسەكانیدا، ئەو بەرپرسەی هاتووچۆ، گووتیشی" لەكاتی دانانی مەفرەزە هەر ئۆتۆمبێلێكی جام رەش كە لەلایەن پۆلیسی هاتووچۆ دەبیندرێت راستەوخۆ ئیجرائاتی لەگەڵ دەكرێت، گەر ئۆتۆمبێلە ژمارەی هەرێمی پێوەبێت پسولەیەكی سەرپَچی  بۆ دەكرێت بەو هۆكارەی كە ئۆتۆمبێلەكە جام رەشە،  هەروەها  گەر ئۆتۆمبێلێك ژمارەی پێوەنەبێت راستەوخۆ لەلایەن تیمەكانی پۆلیسی هاتووچۆ دەستی بەسەردا دەگیرێت و دەهێندرێتە ناو بەڕێوەبەراتی هاتووچۆ، هەروەها لە ئێستادا نوسراوێك هەیە گەر خاوەنی ئۆتومبێلێك بیەوێت ئۆتۆمبێلەكەی بۆ هەمیشە جام رەش بكات، دەبێت شۆفێر داواكاریەك ئاراستەی بەڕێوەبەرایەتی هاتووچۆی هەولێر بكات، گەر ئۆتۆمبێلەكەی ژمارەی  هەبێت، ئەوكات دەتوانێت جامی رەش بكات، ساڵانەش بڕی پارەی دیاری كراو دەدات و بەپێی رێژەی رەشكردنەكەشی خەملاندنی بۆ دەكرێت".
لەبارەی رۆڵ و گرنگی ساڵییانە لە سنووری سۆران، روونی دەكاتەوە" كردنەوەی بەشی ساڵییانە لە بەڕێوەبەرایەتی بەشی هاتووچۆی سۆران گرنگییەكی تایبەتی هەبوو لەو ماوە كەمەی كە كراوەتەوە ئەو ئۆتۆمبێلە تایبەتانەی كە سەردانی بەرێوەبەرایەتی  هاتووچۆی سۆرانیان كردووە 1089 ئۆتۆمبێل لەماوەی كردنەوە بەشی ساڵێیانە تا ئێستا بەناوكراون، هەروەها 1000 ساڵیانە نوێكراونەتەوە لەگەڵ  نزیكەی 400 تابلۆ نوێ كراونەتەوە، سەبارەت بە ئۆتۆمبێلە بارهەڵگرەكانیش 300 شۆفێری بارهەڵگر سەردانی هاتووچۆی سۆرانیان كردووە بۆ نوێكردنەوەی ساڵییانەكەی، هەروەها نوێكردنەوە و دەرهێنانی ساڵییانە تەواوی  رێكارەكان بە كاتژمێرێك ئەنجام دەدرێن و هاووڵاتی دەتوانێت لە ماوەی یەك كاتژمێر  ساڵییانەی نوێكەی خۆی بباتەوە، بۆیە كردنەوەی ئەم بەشە سوودی گرنگی بۆ هاووڵاتییان هەبوو، چونكە لەمەودوا پێویست بە هەولێر و بڕینی ئەو رێگا دوورە ناكات كە پڕە لە مەترسی، لە هەمانكاتیشدا خەرجیەكی زۆر بۆ هاووڵاتییان و شۆفێران دەگەڕێتەوە، بۆیە تەواوی هاووڵاتییانی سنووری ئیدارەی سەربەخۆی سۆران بە هەر چوار قەزاكانیەوە لەگەڵ ناحیەی هەریر دەتوانن بۆ نوێكردنەوە و دەرهێنانی ساڵیانە لە سۆران كارەكانیان ئەنجام بدەن.
لەبارەی رێژەی ئافرەتان بۆ دەرهێنانی مۆڵەتی شۆفێری، گووتی" بەخۆشحاڵییەوە شۆفێریكردنی ئافرەتان لە سنووری ئیدارەی سۆران زیاد بووە، بەڵام رێژەكە ساڵانە گۆڕانی بەسەر دا دێت بەرزی و نزمی بەخۆیەوە دەبینێت لەم دە مانگەدا 963 ئافرەت بوونەتە خاوەنی مۆڵەتی شۆفێری".
مقدەم موحسین تەحسین، گووتەبێژی هاتووچۆی سۆران، داوا لە شۆفێران دەكات، كەوا لە وەرزی زستان لە كاتی بەفر و باران، زۆربەی رێگەكانی سنوورەكەمان دەبنە بەستەڵەك لە بەشێك لە رێگاكان شۆفێر دەبێ بەوریایەوە شۆفێری بكات و زۆریش گەشت نەكات". 

زۆرترین بینراو