سەرۆک نێچیرڤان و چەند مەلیۆن چاڤ

غیاس خالد زێباری 

       
         نێچیرڤان بارزانی سەرۆکێ هەرێما کوردستانێ ئێکە ژ کەسایەتیێن سیاسیێن کاریزما و هەلگرێ کلیلێن ڤەکرنا دەرگەهێن پۆلایی و ڤەکرنا پەنجەرێن دیتنا ئاسۆیێن گەش، ئو سەرۆک و سیاسیێ مەزنە ئەوێ د رۆژێن دژواردا ل ساڵا ( ٢٠١٧ )  ێ ،  بن سێبەرا پیلانێن هەرێمایەتی و نیڤ دەولەتی و خیانەتا نافخۆیی هەرێما کوردستانێ دناڤ بێ ئۆمێدیێ دا رزگار کری و پڕ ئۆمێدی ئێخستیە دناڤ دلێ هەر کوردەکێ نشتیمان پەروەر و خودان هەستا نەتەوی . 
ئەو سەرکردە و سیاستمەدارە ئەوێ هەردەم  گرنژین لێ وەشیت و رنژینێ د ئێخیتە سەر لێڤێن گەلێ خوو ، ئەو سەرۆکە ئەوێ بوویە هێم و هێمایێ ئاشتەوایا سیاسی و جڤاکی و دروستکرنا ئێکرێزیێ . 
دشێین بێژین کوپیەکا رەحمەتی شهید ئدریسێ سەرکردە و کاریزما و دووربینە ئەوێ ناسناڤێ کەسایەتیێ رۆژێن دژوار لسەر هاتیە دان . 

براستی سەرۆک نێچیرڤان بارزانی سەرۆکێ هەرێما کوردستانێ مینا بابێ خوو ،  کەسایەتیێ رۆژێن دژوارە ، ئەڤرۆ هەرێما کوردستانێ ژبەر دووبەرەکی و ژێک دۆرکەفتنا پارتیێن کوردستانی و پەیامێن هەڤدژی ئێک ، هەرێما کوردستانێ کەفتیە بن مەترسی و گەفێن وەڵاتان  ، لسەر ئاستێ دەولەتا ئیراقێ ژی دیسان گەفێن دژوار لسەر کوردستانێ هەنە ، جار جار مۆشەک و بۆمبە بارانکرنا هەرێمێ ، جار هاتنا لەشکرێن ەڵاتێن هەرێمی ، جار دەرکرنا بریارێن دوژمنکارە دەرهەقی هەرێمێ ژلایێ دادگەها فیدرالا ئیراقێ ، جار بڕینا بۆدجە و مۆچە و ....هتد . 

ڤێ ڕەوشێ خەلکێ کوردستانێ و وەڵاتێن دوستێن کوردا دلگران کریە ، چاڤێ مەلیۆنان ژ خەلکێ کوردستانێ و دوستێن وان ل گاڤ و دەستپێشخەریا سەرک نێچیرڤان بارزانی یە و ئۆمێد و باوەری هەیە کۆ سەرۆک نێچیرڤان ئەو  سیاسی و کەسایەتیێ مەزنێ هەلگرێ پرۆژە و  بیرۆکێن درۆستکرنا ئێکرێزی و ئێکگۆتاریا هێز و ئالیێن سیاسی یێن کوردستانێ و حەلاندنا چیایێن مەزنێن جەمەدا سیاسی و سەر ژنوو شاراندنەڤا گیانێ برایەتیێ، برایەتیەکا وەسا کۆ بسەر وان هەمی پیلان و ئاستەنگێن وەکی مینا لهەمبەر پێشڤەچوونا هەرێما کوردستانێ هاتینە دانان . 
ئەز باوەرم سەرۆک نێچیرڤان بارزانی دڤێ ئەزۆنا خودا دێ یێ سەرکەفتی بیت و دێ شێت سازانێ دناڤبەرا لایەنێن سیاسی دا درۆست بکەت ب تایبەت دناڤبەرا پارتی دیموکراتی کوردستان و ئێکەتیا نشتیمانی دا ، چونکی سەرۆک نێچیرڤان د ئەزمۆنێن زەحمەتتردا بسەرکەفتیە و خاندنێن راست و ئەرێنی بۆ رەوشا سیاسی و گۆڕانکاریێن دەڤەرێ هەنە . 
تەڤایا خەلکێ نشتیمان پەروەرێ کوردستانێ چاڤ ل گاڤ و دەستپێشخەریێن سەرۆک نێچیرڤان بارزانی یە بۆ زاڵبوون بسەر وان گرێ و ئاستەنگێن لهەمبەر سازان و ئێکرێزیا کوردستانێ درۆست کری و باوەردارن ئەنجام دێ چارەسەریا قەیرانێن ناڤخۆیی بن کۆ ببنە ئەگەرێ چارەسەرکرنا قەیرانێن دگەل بشکەکا ئالیێن سیاسی یێن ئیراقی و دەولەتا ئیراقێ هەی ، ب مەرجێ حزبێن کوردستانێ ب هەستەکا نشتیمانی و پاراستنا بەرژەوەندێن گشتی سەرەدەریێ بکەن .

زۆرترین بینراو