لە ئیدارەی سۆران .. هەر فەرمانبەرێك پابەند نەبێت سزا دەدرێت

لە ئیدارەی سۆران .. هەر فەرمانبەرێك پابەند نەبێت سزا دەدرێت

ئا/ رۆاژن قیاس
لە رۆژانی رابردوو، لیژنەیەك بە سەرۆكایەتی هەڵگورد شێخ نەجیب، سەرپەرشتیاری ئیدارەی سۆران لە نزیكەوە سەردانی چەند نەخۆشخانە و فەرمانگەكانی سۆرانی كرد، بەپێی زانیاریەكان سزای ئەو كارمەندانە دراوە  كە لە دەوامی رۆژانە كەمتەرخەمی دەكەن،  ئەمەش كاردانەوەی زۆری لێكەوتەوە و هاووڵاتییان دڵخۆشن بەو كارە، بەڕێوەبەری راگەیاندن و پەیوەندییەكانی ئیدارەی سۆرانیش دەڵێت": هەر فەرمانبەرێك پابەندی دەوامی رۆژانەی خۆی نەبێت رووبەرووی لێپێچینەوە و سزای یاسایایان دەكەینەوە . 

ئومێد گەیلانی، چاڵاكوانی مەدەنی لە سۆران،  لە بارەی ئەم هەڵوێستەی سەرپەرشتاری ئیدارەی سۆران بۆ زاری كرمانجی گووتی": یەكێك لە خاڵە بە هێزەكانی بەڕێوەبردن لێپێچینەوە و بەدواداچوونە، لە هەر ئیدارەیەك ئەم خاڵەی تێدا پەیڕەو كرا  بەرەو سەركەوتن و پێشكەوتن دەچیت، ئیدارەی سەربەخۆی سۆران خاك و ژینگەو خەڵكە قارەمانەكەی پێویستیان بە خزمەتگوزاری زیاترە، گەنجان و لاوانی ئەو دەڤەرە چاویان لە پێشكەوتنی زیاترە دەكرێ بەرپرسانی یەكەمی ئەو دەڤەرە لە ئەركەكەی خۆیاندا كاری زیاترو چاوەدێری زیاتر بكەن بۆ ئەوەی باشترین خزمەتگوزاری لە گشت بوارەكان پێشكەش بە ئیدارەی سەربەخۆی سۆران بكەن .
زیاتر گووتی:"ئەم هەوڵانەی سەرپەرشتیاری ئیدارەی سەربەخۆی سۆران بۆ بنبڕكردنی گەندەڵی و نەهێلانی ڕۆتینیات، جێی دەست خۆشییە چونكە ناكرێ بەرپرسێك یان كارمەندێكی حكومەت لەهەر پێگەیەك بێت كەمتەرخەمی بكات سوپاسنامەی بدرێتێ! پێویستە لێپێچینەوەی یاسایی لەگەڵ بكرێ بۆ ئەوەی چیتر كەمتەرخەم نەبێت و خزمەت بكات، هیوادارم لێپێچینەوەو بەدواداچونەكان بەردەوام بن بە ئامانجی خزمەتی زیاتر".
حەسەن هاشم، پیشەی مامۆستایە بە زاری كرمانجی گووت" هەبوونی پاداشت و سزا زۆر پێویستە لە سەرجەم دام و دەزگا حكومیی و ناحكومییەكان، چونكە دەبێتە هاندەر و وەسیلەیەك بۆ بەڕێكی و بەباشی بەڕێوەچوونی كارەكان، سەرپەرشتیاری ئیدارەی سۆران بوو بە سەرقافلەی دەستپێكی ئەو كارە گەورەیە، كە هیوادارم سەرجەم بەڕێوەبەرەكانی بەڕێوەبەرایەتییەكان ڕۆژانە سەردانی هۆبە و بەش و فەرمانبەرەكانیان بكەن، چونكە بەراستی هەموومان دركمان بەوەكردووە كە دەوامكردن ڕۆتیناتێكی گەلێ زۆری تێكەوتووە .
زیاتر گووتی" ئەگەر سەیری بكەین ڕۆژانی پێنج شەممە دەوامكردن لە هەموو فەرمانگەكان بەشێوەیەك پشتگوێ دەخرێ وەك ڕۆژێكی پشووی لێهاتووە، هەروەها من وەك مامۆستایەك دەبینم لەبەشێكی زۆری قوتابخانەكان هەندێ مامۆستا هەیە بەحەزی خۆی دەوام دەكات بەبێ ئەوەی هیچ لێپرسینەوەیەك هەبێت، یاخود یەك دوو وانە ڕۆیشتووە ئەوكات دێتە قوتابخانە، كە ئەمەش وادەكات مامۆستایەكانیتر ساردبكاتەوە لەسەر دەوامكردنێكی ڕێك و پێك، بۆیە داواكارم لە سەرپەرشتیاری ئیدارەی سۆران كە پەنجەمۆر بۆ سەرجەم فەرمانگەكان دابین بكات، لە ئەگەری زۆری نەهاتنە دەوام و تاخیربوون ئەو فەرمانبەرە سزا بدرێ بە كەمكردنەوەی ڕاتب یان بەنەهاتوو هەژمار بكرێت، لەهەمان كاتدا ئەو فەرمانبەرەی جددیە و دەوام و كارەكانی خۆی بەڕێكی دەكات پاداشت بكرێ تا ببێتە هاندەرێك بۆ فەرمانبەرەكانیتر".
لای خۆیەوە، هەژار حەكیم بەڕێوەبەری راگەیاندن و پەیوەندییەكانی ئیدارەی سۆران بە زاری كرمانجی راگەیاند:" بۆ بەرژەوەندی گشتی هاووڵاتییان و دەوام كردن بە شێوەیەكی تەواو، لە ئیدارەی سۆران بڕیار دراوە هەر فەرمانگەیەكی حكوومی كەمتەرخەمی لە دەوامی رۆژانە بكات، لێپێچینەوەیان لەگەڵ دەكرێت و روبەڕووی سزا و یاسایان دەكەینەوە، بۆ ئەم مەبەستەش سەردانی شوێنە حكوومییەكان دەكرێت  .
زیاتر گووتی:" لە رۆژانی رابردووش، سەردانی نەخۆشخانەی ئاشتی گشتی كرا و بەهۆی كەمتەرخەمی تێبینی تۆمار كرا سزای پزیشكێكیش دراوە. 

زۆرترین بینراو