ژن لە روانگەی پیاوسالارییەوە

ناسك نەسیری

بەدەر لە هەر جۆرە چەوساندنەوەیەكی فیزیكی و بەرجەستەی ژن لەلایەن عەقڵییەتی پیاوسالارییەوە، ئێمە دەخوازین چەوساندنەوە و ئەتككردنێكی شاراوەی دنیابینی پیاوسالاری بخەینە بەرچاو، كە بریتییە لە دیتنی ژن لە رەهەندی سێكسوالێتییەوە. ئەم دیاردە زادەی عەقڵی كلاسیكی ئێمە نییە، بەڵكو دیاردەیەكی گەردوونی سەراپاگیرە. چونكە هێشتا پیاو " ئەو پیاوانەی هەڵگری عەقڵی پیاوسالارین" ناتوانن ژنێكی سەربەخۆ و بەرجەستە ببینن لە دەرەوەی ئەو نەزعە سێكسوالێتییەی لەسەری پەروەردە بوون. ئەمە داڕنینی ژنە لە مێژوو، داڕنینی و تەجریدكردنی ژنە وەك ئینسانێك سەرەتا، دواتریش وەك بەشێكی زیندوو لە پرۆسەی بەرهەمهێنان و بنیاتنانی ژیان.
لەوە دەچێت ئەم دیاردەیە هەر تایبەت نەبێت بە پیاوی كورد، بەڵكو بە دیقەتدان لە بنج و بنەوانی ئەم دیاردەیە ئەوە روون دەبێتەوە، هێشتا عەقڵی نێرسالاری ژن وەك سەرچاوەی لەزەت تەماشا دەكات، بۆ ئەو گرنگە ژن ئەو بوونەوەرە قەشەنگ و زەریف و شۆخە بێت، هەوەسەكانی دەیخوازێت نەك ژنێكی تێگەیشتووی ئاست بەرز لە هەموو رووە فیكری و فەرهەنگیەكانەوە. پیاوانی توشبوو بە نەزعەی نێرسالاری ژنیان وەك ژن خۆش ناوێت، بەڵكو وەك جەستەیەكی ئاوریشمی حەزیان لێیەتی. ئەمە لە قووڵاییدا مانای زۆری هەیە، یەكێك لەوانە دوپات كردنەوەی هەمان دیدی كلاسیكی پیاوسالارییە كە ژن وەك پاشكۆ دەبینێت نەك وەك كائینێكی سەربەست و سەربەخۆ.
لە راستیدا توندوتیژیی بەرجەستە بەرامبەر بە مێینە، دیوە رەق و مەلموسەكەی توندوتیژییە، بەڵام خودی ئەو توندوتیژییە لەناو عەقڵییەتەكاندا قوڵپ دەدات، هەر بە تەنیا لێدان و كوشتن بەبێ ئەو ئامادەگیە زیهینیە مومكین نییە و نابێت. رەنگە خەڵكانێك هەبن لە توێژی رۆشنبیرانیش بن، بێ ئاگا لەوە گرفتارن بە دیدی پیاوسالاری، خۆ پیاوسالاری بەو شێوەیە تەرجەمە واقیع نابێت، هەر دەبێت بكوژ و توندوتیژ بیت، لەناو گوتار و رەفتاری نەرمی زۆرێك لە پیاواندا عەقڵیەتی پیاوسالاریی بەو جۆرەی باسمان كرد ئامادەگیەكی ئاشكرای هەیە،. مەرج نیە كوشتن هەر تەنها سڕینەوەی جەستەیی بێت، بەڵكو رەنگە شیعرێكیش بێت كە ژن دەكاتە كاڵایەكی سێكسی، رەنگە ئەو دیدگایەش بێت وەها لە ژنانیش دەكات لە روانگەی پیاوەوە لە خودی خۆی بڕوانێت.
بە كورتی لەم ڕۆژەدا دەمەوێت باس لەوە بكەم كە خەباتی ژنان، تەنیا راگرتنی قەتڵی ناموسی نیە، بەڵكو لەگەڵ ئەو تێكۆشانەدا پێویستمان بە كاری رۆشنگەری هەیە، كە یارمەتیدەر بوون بۆ تێگەیشتنی ئینسانی لە ژن، بۆ راستكردنەوەی عەقڵیەتێك كە تێیدا ژن كاڵایە و پیاو خاوەن كاڵا. ئەگەرچی بە زەحمەتێكی زۆر دەتوانیت ئەو زیهینیەتە بناسیتەوە، لە قوڵایی ئەندێشەی ئەم نەخۆشیەدا كاربكەین چونكە ئەم روانینە روانینی مرۆڤانە نییە بۆ ژن، بەڵكو روانگەیەكی جێندەریە بۆ خودی ئافرەت و كێشە بنەڕەتییەكانی. دەبێت ژنان و پیاوانی ئازادیخواز پێكەوە كار بكەن بۆ ریشەكێشی ئەو فەرهەنگەی نامۆیی دەخاتە نێو هەردوو رەگەزە، بەهۆی ئەمەشەوە ناتوانن لە یەكتر تێبگەن بەبێ روانینی سێكسوالێتی.

بابەتى پەیوەندیدار بیروڕا

زۆرترین بینراو