Share on facebook
دەرماڵەی قوتابیانی زانكۆ و پەیمانگاكان دەگەڕێنینەوە
دووشەممە, 08 نیسان 2019 11:09


چاوپێكەوتن – ڕائیب شێروانی
نێچیرڤان كەلاری، سكرتێری یەكێتی قوتابیانی كوردستان لە چاوپێكەوتنێكدا لەگەڵ هەفتەنامەی زاری كرمانجی روونیكردەوە، یەكێتیی قوتابیانی كوردستان هەوڵەكانی چڕ كردووەتەوە بۆ ئەوەی دەرماڵەی قوتابیانی زانكۆ و پەیمانگاكان خەرج بكرێت، بۆ ئەو مەبەستە قسەمان لەگەڵ  ئەنجوومەنی وەزیران كردووە و بە تەواوەتی پشتگیری لە داخوازی قوتابیان دەكەین بۆ گەڕانەوەی دەرماڵە، چونكە پێمانوایە مافێكی ڕەوای خۆیانە، لەگەڵ ئەوەی داوا دەكەین كە فیدراسیۆنی قوتابیان و خوێندكاران كارا بكرێتەوە و هەموو رێكخراوەكان لەژێر یەك چەتر كار بكەن و كار بۆ بەدەستهێنانی مافەكانی قوتابیان بكەن.
كەلاری، گوتی:" وەكو یەكێتی قوتابیان ساڵی رابردوو سەردانی وەزارەتی داراییمان كردووە لەسەر گەڕانەوەی دەرماڵە قسەمان لەگەڵ كردوونە، كە شەڕی داعش نەما، نرخی نەوت بەرزبۆتەوە، دواتریش لە رێگەی ئەوانەوە لەگەڵ ئەنجوومەنی باڵای ئابووری حكوومەتی هەرێم قسە كراوە، لەگەڵ باشتربوونی بارودۆخی دارایی لە ئێستادا و لابردنی پاشەكەوتی مووچەی فەرمانبەران، دۆخی ئابووری هەرێمی كوردستان ئێستا گونجاوترە، بۆیە هەوڵەكانمان چڕكردۆنەتەوە لەگەڵ سەرۆكایەتی ئەنجوومەنی وەزیران قسەمان كردووە لەسەر ئەو بابەتە، هەروەها دیراسەیەكمان ئامادەكردووە لە ماوەیەكی نزیكدا بڵاودەكەینەوە، كۆمەڵێك ڕاپرسی و هەوڵ و میكانیزمی دیكەمان گرتۆتەبەر، بە تەواوەتی پشتگیری لە داخوازی قوتابیان دەكەین بۆ گەڕانەوەی دەرماڵە، پێمانوایە مافێكی ڕەوای خۆیانە و پێویستە حكوومەتی هەرێمی كوردستانیش بەو بڕیارەی كە دابوو بۆ ڕاگرتنی دەرماڵە بەو بڕیارەدا بچێتەوە و لەبەر ئەوەی ئەو دەرماڵەیە ئەگەرچی بڕەكەی كەمە، بەڵام پێداویستییەكانی خوێندنی رۆژانەیان پڕ دەكاتەوە، ئەوەش بە زەرورەت دەزانین، هەم كاری بۆ دەكەین و هەمیش پشتیوانی هەر هەوڵێك دەكەین و بەڵێنیش بە قوتابیان دەدەین كە ئێمە وەكو یەكێتی قوتابیان زامنی گەڕانەوەی مافەكانیانین.
سكرتێری یەكێتی قوتابیانی كوردستان دەشڵێ:" وەكو یەكێتی قوتابیانی كوردستان بەردەوامین لە بەدواداچوون بۆ كێشە و گرفتەكانی قوتابیان لە رێگەی نوێنەرەكانمانەوە لەسەرجەم ناوەندەكانی خوێندن، ئەركی سەرەكی ئێمە ئەوەیە و بەردەوامیش دەبین، میكانیزمان گرتۆتەبەر، لە رێگەی نوێنەرەكانمانەوە گلەوگازندەیی قوتابیانمان وەرگرتووە، بەڵام لەگەڵ پێشكەوتنی تەكنەلۆجیا ئێمە كۆمەڵێك میكانیزمی دیكەمان هەیە، لەوانە لە رێگەی سۆشیال میدیا و لە رێگەی وێب سایتی فەرمی یەكێتی قوتابیان دەتوانین گلە و گازندەی قوتابیان وەربگرین و كاری لەسەر بكەین.
نێچیرڤان كەلاری، ئاماژەی بۆ ئەوەشكرد:" لە داهاتوودا پرۆژەی ئەوەمان هەیە كە زیاتر گرنگی بە بەهرە و توانای قوتابیان بدەین، هەروەها كاردەكەین بۆ ئەوەی قوتابیانی بەهرەمەند لەبوارە جیاوازەكان، قوتابیانی سەركەوتوو، ئەو قوتابیانەی كە داهێنەرن و خاوەن بیری داهێنەرانەن، بتوانین لە پرۆژەكانیان هاوكاری بكەین و پاڵپشت بین و لە رێگەی لایەنە پەیوەندیدارەكان كۆمەك بۆ پەیدا بكەین، تا بتوانن زیاتر پەڕە بە كارەكانیان بدەن.
لە كۆتاییدا نێچیرڤان كەلاری، سكرتێری یەكێتی قوتابیانی كوردستان رایگەیاند:" لەسەر ئاستی ناوخۆ چەند ساڵێكە كار دەكەین، بۆ ئەوەی كە فیدراسیۆنی قوتابیان و خوێندكاران كارا بكرێتەوە و هەموو رێكخراوەكان لەژێر یەك چەتر كار بكەن و كار بۆ بەدەستهێنانی مافەكانی قوتابیان بكەن، بەداخەوە ئەوە بۆ نزیكەی 6 ساڵ دەچێت ئەو فیدراسیۆنە پێكنەهاتووە و هەوڵەكان ڕاگیراون، لەگەڵ ئەوەش كە فیدراسیۆن كارا نەكراوەتەوە، ئێمە وەكو یەكێتی قوتابیان لە ماوەكانی رابردوو هەر پرسێك پێویستی بەوە بووبێت كە رێكخراوەكان پێكەوە بووبن، لە كاتێكدا وەكو پێویست بەدەم داواكاری یەكێتی قوتابیانەوە نەهاتوون، بۆ كاراكردنەوەی فیدراسیۆن، بەڵام ئێمە وەكو یەكێتی قوتابیان پێمانوابووە كە شوێنی قوتابی لەسەرووی هەموو ئەو بابەتانە بووە، بۆیە لە هەر پرسێك پێویست بووبێت، بەتایبەتی لە پرسی چارەسەركردنی كێشەی وەرگرتنی قوتابیان لە زانكۆ و پەیمانگاكان، هەروەها لەم دوایەش لە پرسی دەرماڵەی قوتابیان، ئێمە وەك یەكێتی قوتابیان دەستپێشخەریمان كردووە و هەمیش بەشداربووینە لە كۆبوونەوەی رێكخراوەكان".