Share on facebook
مەعاف مەناف "كاتێك ناوی ئەنفالم بەر گوێ دەكەوێت راستەوخۆ بیر لە باوكم و 48 ئەندامی خێزانەكەم دەكەمەوە"
یەک شەممە, 14 نیسان 2019 16:42

بەیان رەشید "سەرەڕای بارودۆخی خراپی دەرونی دەبوایە بەردەوام كار بكەین و پەروەردەی منداڵەكانمان بكەین

بەرەڤان شاكر سلێمان لاچ- سۆران: مەناف مستەفا یەك لە ئەنفالكراوەكانە و لە ساڵی 1958 لە گوندی كانیبوت لەدەڤەری بارزان لە دایك بووە، لە دایك بوونی مەناف هاوكات بووە، لەگەڵ ئەو گوڕانكاریانەی لە ناوچەكەدا دروست بوون و هاوكات لەگەڵ گەڕانەوە بارزانی نەمر و هەڤاڵانی لە سۆڤیەت بووە. مەناف مستەفا وەك هەر منداڵێكی كورد سەرەتای ژیانی بە كاری كشتوكاڵ و ئاژەڵداری خۆی خەریك كردووە، لەبەر خراپی بارودۆخی سیاسی و كۆمەڵایەتی ئەو كاتی كوردستان تا قۆناغی ناوەندی خوێندوە و نەیتوانیوە درێژە بە خوێندن بدا.

مەناف لەگەڵ زۆربەی دانیشتوانانی گوندەكانی كوردستان لە ساڵی ۱۹۷۷ ئاوەرەی شارۆچكەی دیانا كراوە و گوندەكەی لەلایان حكومەتی ئەو كاتی عێراقەوە چوڵكراوە، لە دیانا لە كۆمەلگایەكی زۆرە ملیدا نیشتەجێ دەبێت.گ كۆمەڵگا زۆرە ملیەكان بەو ناوچانە دەگوترا كەوا حكومەتی عێراق لە چوارچێوەی راگواستنی گەلی كوردستان دروستی كردن بۆ ئەوەی گەلی كوردستان لەو كۆمەڵگایانەدا بخەنە ژێر چاودێری خۆیان. "مەناف نەیویستووە سەربازی عێراقی بكات بوویە خۆی حەشاردەدات و دەچێتە كۆمەڵگەی قۆشتەپە، دواتر خەریكی كاری بازرگانی دەبێت و بەردەوام پەیوەندی بە رێكخستنی نەهێنی ناو هەولێرەوە دەكات و بەردەوام پەیوەندی لەگەڵ پێشمەرگە و رێكخستنە نەهێنیەكانی ترەوە هەبووە، لە ساڵی ۱۹۷۹ ژیانی هاوسەرگیری لەگەڵ بەیان رەشید شوان پێكهێناوە.

مەناف كانیبوتی بەهۆی شارەزای لە زمانەكانی عەرەبی و فارسی بەردەوام نامەی لە ناو رێكخستنە نەهێنیەكانی ناو پێشمەرگەدا ئاڵوگۆر كردووە، دەستێكی كارامەی لە نووسینی شەعر و پەخشان و بابەتە ئەدەبیەكاندا هەبووە، پێش ئەنجامدانی پڕۆسەی ئەنفال مەناف مستەفا چەندین جار لە لایان حكومەتی ئەو كاتی عێراقەوە دەستگیر دەكرێت، سەرەڕای ئەشكەنجەدانێكی زۆر بەڵام دان بە هیچ شتێكدا نا هێنێت و دواتر ئازاد دەكرێت.

لە دوای دەرچوونی بڕیاری ئەنجامدانی  پڕۆسەی ئەنفال لە لایان حكومەتی عێراقەوە مەناف بە مەبەستی سەردان و كاری بازرگانی لە كۆمەڵگای بەحەركە بووە، سەرەڕای ئەوەی جلوبەرگی كوردیشی لەبەر نەبووە بەڵام كەوتووبووە ناو بازگەیەكی حكومەت، دوای ئەوەی لێپێچینەوە لەگەڵ كراوە زانراوە كوردە بوویە هەر ئەو كاتە دەستگیر دەكرێت، سەرەڕای ئەوەی هەوڵێكی زۆر دەدات بۆ ئازاد بوون، بەڵام دواجار لەگەڵ خەڵكی ناوچەكە شوێن بەزركراوە و راگوێزراوە بۆ باشوور و ناوەڕاستی عێراق. پڕۆسەی ئەنفال لە بیرەوەریەكانی بەیان رەشیدی هاوسەری مەناف بەم جورە باسی لێوكراوە" كاتژمێر ٥ی بەیانی ژمارەیەكی زۆری سەربازی عێراقی دەوریان لە كۆمەڵگا زۆرە ملیكان گرت، سەرەتا كەس زانیاری لەسەر هاتنی ئەم ژمارە زۆرەی سەربازیەكان نەبوو، بەڵام دواتر چەند كەسێك بە جلوبەرگی مەدەنی هاتنە ناو كۆمەڵگایەكە و داوایان كرد هەوڵی هەڵاتن نەدەن، گووتیان حكومەت بۆ چەند مەبەستێك دەیانەوێت لەگەڵتان كۆببێتەوە، لەو كاتەدا هەندێك كەس خۆیان حەشاردا و ژمارەیك هەڵاتن و ژمارەیەكی زۆریش دەستگیر كران. ئیدی كەسمان چارەنوسی ئەمانەمان نەزانی و دوای ماوەیك زانیمان كەوا ئەمانە ئەنفالكراون. ئیدی بێ پیاو و برا و باوك و خاڵ و كەسوكار ماینەوە، سەرەڕای بارودۆخی خراپی دەرونی، دەبوایە بەردەوام كار بكەین و پەروەردەی منداڵەكانمان بكەین>

مەعاف مەناف كوری یەكێك لە ئەنفالكراوەكانە و دەڵێت"  شەش مانگ دوای ئەنفالكردنی باوكم لە دایك بوویمە، من و باوكم یەكتریمان نەبینیوە، هەردەم لە نازی باوكایەتی دوور و بێ بەش بوویمە". مەعاف بەردەوام بوو گووتی"گەرچی دایكم توانی هەم ئەركی خۆی و هەم ئەركی باوكم جێبەجێ بكات، بەڵام نەبوونی باوك بۆ من برینێكە هەردەم نوێ دەبێتەوە، هەر لە تەمەنێكی بچوكەوە هەستم بە بێ باوكی دەكرد و هەر لەبەر بێ باوكیش نەم توانی درێژە بە خوێندن بدەم چونكە باوكم نەبوو و دەبوایە كار بكەم، سەرەڕای ئەوەی ئیهانەی زۆریان پێ دەكردین و ئازاری دەرونیمان زۆر لەسەر بوو"ٚ.

مەعاف باس لە یەك رووداوی ژیانی خۆی دەكات و دەڵێت"ماڵمان لە سۆران بوو، من و دایكم ویستمان بە مەبەستی سەردان بچینە لای داپیرم لە كۆمەڵگای بەحەركە، بازگەیەكی زۆر تۆند لە گەلی عەلی بەگ هەبوو، كاتێك گەیشتینە ئەو بازگەیە لە ناو كوستەر داوای ناسنامەیان كرد كاتێك گەیشتە لای دایكم دایكم ناسنامەكەی خۆی پێدا، سەبازەكە داوای ناسنامەی منی كرد و گوتی ناسنامەی ئەم منداڵەم پێ بدە، دایكیشم گووتی كوری خۆمە و ناسنامەكەی ئەوم نەهێناوە، بوویە سەربازەكە گووتی كەواتە تۆ بڕوو با كوڕەكەت لێرە بێ، دواتر سەربازەكە گووتی ها تۆ خێزانی ئەو كوردانەی كەوا سەرۆكی من هەموو ئەوانەی رەوانەی دۆزەخ كردوون، ئەم رستەیە دایكمی زۆر گریاند و منیش لە بن دەستی ئەم سەربازەدا بووم، هەر بە عەرەبی دەدوا و نەم دەزانی چی دەڵێت و باسی چی دەكات، نەم زانی ستایشم دەكات یان جنێوم پێ دەدات، هەر سەیری ناوچاوانی ئەوم دەكرد و هیچ دەسەڵاتێكم نەبوو، دواجار بە پۆستاڵێكی سەربازی پێنێكی لێدام و لە دەرگای كوستەرەكەوە چوومە ژوورەوە كەوتمە ناو سەرنشینەكان، دواجار رێگەمان پێدرا بەڵام تا گەیشتینە هەولێر هەموو سەرنشینەكان لەگەڵ دایكم دەگریان، ئەم دیمەنە هەردەم لە پێش چاومە، كاتێك ناوی ئەنفالم بەر گوێ دەكەوێت راستەوخۆ بیر لە باوكم و ٤۸ ئەندامی خێزانەكەم  دەكەمەوە كەوا هەموویان ئەنفالكراون ".