Share on facebook
قایمقامی قەزای شەقڵاوە: چەند پرۆژەیەكی خزمەتگوزاری لە سنووری قەزای شەقڵاوە جێبەجێ دەكرێن
سێ شەممە, 07 ئایار 2019 23:23


ئا: ڕائیب شێروانی
قایمقامی قەزای شەقڵاوە دەڵێت، چەند پرۆژەیەكی خزمەتگوزاری لە سنووری قەزای شەقڵاوە جێبەجێ دەكرێن، لەگەڵ كێشەی خانووی كەسوكاری ئەنفالە بارزانییەكان چارە دەكەین.
جوان رەفیق، قایمقامی قەزای شەقڵاوە بۆ هەفتەنامەی زاری كرمانجی گوتی:"دەرخستەمان بۆ زۆر پرۆژە ئەنجام داوە، چاوەڕوانی دابین كردنی بودجە دەكەین، هەر كاتێك بودجە بۆ ئێمە دابین كرا دەست بە دروستكردن و نۆژەنكردنەوەی پرۆژەكان دەكەین، ئەوەش نەبێت كە هەر دەستەوەستا وەستا بین، بەڵكو رۆژانە پرۆژەی بچووك لە شەقڵاوە و شوێنەكانی دیكە ئەنجام دەدەین، پرۆژەی خزمەتگوزاری بە ناوچەكان دەگەینین، بەڵام بۆ پرۆژەی گەورە دەبێت بودجەیەكی باشت لەبەر دەستدا بێت، رێگەی هیران - شەقڵاوە بودجەی بۆ دەرچووە و دەست دەكرێت بە نۆژەكردن و چاككردنەوەی رێگاكە لەگەڵ چەند پڕۆژەیەكی دیكە.
سەبارەت بە كێشەی خانووی كەسوكاری ئەنفالە بارزانییەكان جوان رەفیق، رایگەیاند:" ڕاستە ئەو خانووانە هەندێك كێشەیان هەیە، بەڵام لە هەوڵداین بۆ نەهێلانی ئەو كێشانە لەگەڵ دەست بەكاربوونی كابینەی نوێ كێشەی ئاو، كارەبا، لەگەڵ هەر كێشەیەكی دیكە هەبێت چارە دەكەین و كۆتایی بە كێشەی خزمەتگوزاری لەو خانووانە دێنین".