Share on facebook
"یەكەكانی نیشتەجێبوون بێ پێشەكی و بە قیستی 25 ساڵ بەهاووڵاتیان دەدرێ"
سێ شەممە, 04 ئەیلول 2012 19:09

ZKW: وەزیری ئاوەدانكردنەوەی حكوومەتی هەرێمی كوردستان ئەمڕۆ سێشەم رای گەیاند، بەپێی تازەترین رێنوێنی دروستكردنی یەكەی نیشتەجێبوون بۆ هاووڵاتییانی كەمدەرامەت پێویستە هەر پرۆژەیەك لەماوەی 2 ساڵدا یەكەكانی بەهاووڵاتییان بدا، ئاماژەی دا بەڕێژەی نیوە بەنیوە یەكەی پرۆژەكانی نیشتەجێبوون لە نێوان فەرمانبەرانی حكوومەت و هاووڵاتی دابەش دەكرێ بێ پێشەكی.

كامەران ئەحمەد لە كۆنگرەیەكی رۆژنامەوانیدا لە تەلاری وەزارەتەكەی لە هەولێو، رای گەیاند، ئەمساڵ بۆ یەكەمجار بەپێی رێنوێنی نوێ پرۆژەی دروستكردنی یەكەی نیشتەجێبوون بۆ هاووڵاتییانی كەمدەرامەت و هەژار دروست دەكرێ.

زیاتر گوتی، لەمەودوا هەر پرۆژەیەكی نیتشەجێبوون دەست پێ بكا دەبێ لەماوەی دوو ساڵدا یەكەكان بە هاووڵاتییان بدا، ئەوانەی لە ساڵی 2011 دەستی پێ كردووە دەبێ لە ساڵی 2013 رادەستی هاووڵاتییان بكرێ، ئەوانەی لە 2012 دەستی پێ كراوە دەبێ لە ساڵی 2014 تەواو بكرێن.

روونی كردەوە، لەمەودوا پێدانی یەكەی نیشتەجێبوون بە خەڵكی كەمدەرامەت بەبێ پێشەكی و بە ماوەی 25 ساڵ بە قیست بە هاووڵاتییان دەدرێ و هەر پرۆژەیەكی نیشتەجێبوون بەڕێژەی 50% لە نێوان فەرمانبەرانی حكوومەت و هاووڵاتیانی ئاسایی دێتە دابەشكردن.

زیاتر گوتی، 6 مانگ بەر لە تەواوبوونی پرۆژەكە فۆڕم دێتە دابەشبوون بەسەر هاووڵاتییان، ئەمەش بۆ ئەوەیە لەكاتی پڕكشردنەوەی فۆڕمەكە هاووڵاتییان بەماوەیەكی كەم لە وەرگرتنی یەكەكە سوودمەند بن.

"ئەو هاووڵاتییەی پێویستی بە یەكەی نیشتەجێبوون هەیە دەبێ پێشتر لە هیچ پرۆژەیەكی نیشتەجێبوون یاخۆ وەرگرتنی زەوی سوودمەند نەبووبێ، هەروەها نابێ خانووی بەناو بوو بێ یانیش پێشینەی خانووبەرەی وەرگرتبێ" ئەحمەد گوتی.

- لە (ئاكانیوز) وەرگیراوە.